افتتاحية

سيدي رئيس الحكومة ايجا نحكيلك على 80 % من تونس الي ماتعرفهاش …

سيدي رئيس الحكومة على بالك الي عندك نسبة كبيرة من شعبك يعيش في Noir لا كرني ابيض ولا اصفر ولا احمر يعيش كل نهار بنهارو، الناس هاذي نسيت ماقريتلهاش حسابها…. الناس هاذي لعادة تاكل مالشارع زعمة تعرف شمعناها ياكلوا مالشارع؟؟؟ فما ناس تخرج الصباح تلمد الدبابز البلاستيك وتبربش في الزبل باش لعشية تلمد قوتها وقوت صغارها ، فما ناس عاملة نصب تلقاهم في كل بلاصة في الزنق متاع البلاد العربي، فما ناس تخدم حمالة حزام كل نهار بنهارو، الي يبيع التاي والي يبيع sac بلاستيك في المرشيات، باهي ايجا نحكيلك على صناع البوتيكات الي شطرهم بنات يخدمو على عائلاتهم أم هجالة والا بو معاق، اخطانا من هاذم تعرفهم النساء الي تخدم في الفلاحة ، تتذكرهم الي تقلبت بيهم الكميونة، ممكن ماتعرفش ، باهي تعرفشي الي فما ناس مشردة في الشوارع لا تالي لاوالي لادار لا صغار الناس هاذي كنت تعيش بلي يمدهولها الناس الي يتعداو قدامهم الي يطيش دبوزة ماء والي يطيش كسكروت وكل قدير وقدرو، تعرفهم الناس الي يبيعو الكاكي قدام محطات الكار والتران والتكسيات، تعرفهم الناس الي يدورو بصندوق سيراج باش ينظف صباط باش مايباتش جيعان، سيدي رئيس الحكومة عندك ناس تخدم المرمة في النوار ، عندك ناس تمشي للمرشي سنترال تفرز الطماطم الملوح عالقاعة باش طيب بيه ، سيدي رئيس الحكومة عندنا ناس تاكل مالزبلة…
سيدي الرئيس هاذي تونس الي انتي والوزارء متاعك ماتعرفوهاش هاذي تونس الي فيها عباد عادي تبات بلاش
مرة الجاية نحكيلك 800 ألف بطال ….
سيدي رئيس الحكومة تونس الي حكيت عليها انت موش نفسها الي نعيشو فيها…
مهدي الطرابلسي

اظهر المزيد

مقالات ذات صلة

اترك رد

زر الذهاب إلى الأعلى