ثقافة و اعلام

بقلم سامي دمّق: تونس لن تصبح مثل دبي…

تونس لن تصبح مثل دبي
المشهد ضحّك برشه ناس…كيف قالت العرافة تونس باش تولي كيف دبي و سامي الفهري بدا يضحك ….انا حسيت بوجيعة….و الله لا يحشم…نتخيل في العرب يتفرجوا عليه يضحك خاطر تونس في مخه مستحيل تولي كيف دبي ….
بالحق تونس مستحيل تولي كيف دبي …. في دبي ما عندهمش قاضية تحكم….في دبي ما عندهمش ادب …ما عندهمش ناس تخترع……ما عندهمش صناعة بايادي تونسية…ما عندهمش فلاحة م الفجاري يزرعوا و يسقيوا….في دبي ما عندهمش مسرح اماراتي و سينما اماراتي ….كل تاريخهم سباق بعير ….ما عندهمش نظام سياسي و احزاب و صحافة حرة…. في دبي عندهم 4 نساء….عندهم هنود و فيتناميات مستعبدين….احنا العبودية كملناها من القرن 19…..في دبي ما عندهمش مرا فلاحة…ما عندهمش مرا صاحبة اعمال….ما عندهمش استاذة و معلمة و طبيبة و فرملية…
مستحيل تونس تولي كيف دبي….ما انجموش نوليوا هوايش….تونس بفقرنا نعطيوا في دروس للعالم …و ببترولهم و كل ناطحاتهم ما ينجموش يفهموا دروسنا….
اش قرب تونس لدبي ؟؟… بيناتنا سنوات ضوئية من الذكاء و الانسانية و الحضارة …تونس تعيش بنصفي شعبها من الرجال و النساء….و دبي تعيش بنصف شعب…المرا التونسية مزيانة بالسروال و بالروبة و بالخلة و بال mini ….التونسية تعمل شوية gloss تضبّع رجال الكرة الارضية…المرا في دبي تعمل 80 كيلو ماكياج و تخرج كي السحارة المرعوبة….
في تونس عندنا مطمورة الحامة و قصر الجم و قرطاج و سبيطلة ….اش قرّب هاذم الكل لناطحات سحابهم…. في تونس عندنا عمارات اربعة و خمسة طيقان كهو اما بناوهم توانسة بعرق الخدام التونسي و بعلم المهندس التونسي و بياجور معمل تونسي و تراب تونسي و دهن تونسي …و يسكن فيهم المعلم التونسي و الاستاذة التونسية و المحامية التونسية….
تونس ما توليش كيف دبي…تونس اكبر من دبي و من ابو ظبي و من كل قطر و الامارات و الكويت و العالم العربي اجمعين
سامي دمّق

اظهر المزيد

مقالات ذات صلة

اترك رد

زر الذهاب إلى الأعلى